Tykkääkös net vai mitänet tekkee!

Net ei tykkää minusta.
Kukhaan ei välitä.
Apua, mua ei rakasteta, kukhan ei arvosta minua!
Eikä mithään rakhautta ole ees olemassakhaan.
Rakhaus on loppunu.
Tylsyyttä ja kurjuutta vain piisaa. On niin tyhjää.
Kauheaa, ko kaikki on menny tämmöseksi.
Nykyhjään ei löyvvy välittämistä.
Saatikka sitte, että näkis rakhautta mishään.

Tuuletusikkunakki häätyy panna kiinni.
Ei ees raolheen voi jättää.
Ei pikkustakhaan.
Kaikki visusti ja viishaasti kiinni!
Vastaanottoki meillon kiinni.
Lähetys kans kiinni, kiinni!
Ja hyvistä syistä kyllä.

Entäs, miltäs kuulostas semmonen, että
raottasima sitteki sitä tuuletusikkunaa.
Ja vaikka toistaki ikkunaa
Sitte ovi raolheen, miltähän se tuntus.
Kokkeiltaiskos ovea ihan auki.
Kohta vois olla kaikki räppänät sepposen selählään.
Nostasima vielä kaikki luukut
saranoilthaanki kokohnaan pois.
Mitä nuita kyttäähmään.

Aukinaisista ovista ja ikkunoista
kulkis sitte se mitä vain.
Se tulis ja menis.
Kaikki vastaanotot ja lähetykset ois jatkuvasti auki.
Kulkis ihan valtoimenhaan ja valloilhaan.
Mitä sitä pihtailheen mithään.
Lakkaisima kärvistelemästä ja uikuttelemasta.
Antasima mennä. Ja tulla. Antas tulvia.
Antas tulvia syämmestä ja päästä ja käsistä ja kaikesta.
Siinä tulvassa kylpisimä ittemä oiken hyväksi.
Oiken täyvvellisen hyväksi.
Hyvänpäiväseksi kylpisimä ittemä siinä tulvassa.

Eläsimä siinä.
Eläsimä siinä emmäkä anoskelis emmäkä pyytelis mithään.
Emmä kerjäilis mithään kelthään eikä misthään.
Emmäkä pitäs mithään kirjaa misthään arvostuksista.
Eikä ainakhaan muitten välittämisistä.
Välittäsimä itte.
Ei katottas eikä kyseltäs yhtään mithään kelthään muilta.
Ei kytättäs, tykkääkös net vai mitänet tekkee.
Solis aivan sama sille.
Itte vaan päästäsimä kaiken menehmään.
Pursuiltas ylikki aivan vaphaasti.

Semmostason.
Se on se rakhaus sitä ja siinä.
Met olisima alkahneet oman rakhauskylpemisen.
Oikean rakhaussaunan.
Omassa rakhauvvessa.
Rakastasima ommaa itteä aivan hullun lailla.
Met emmä oottas, että muut kerkiäiskhään meitä rakastahmaan.
Memmä kerkiäis kuvitellakhaan, mitä net muut tekkee.
Met rakastasima koko ajan itte itteä.
Ei kerettäs sykkyröihmään mithään.
Meän ois hyvä olla ja meän kanssa ois hyvä olla.

Molema täpötäynnä rakhautta ja arvostamista ja välittämistä.
Umpitäynnä rakhautta joka iikka!
Eikä tämole mikhään pila.
Kuvittele, tämon tosi.
Suosittelen.

Rakhauvvella Hilkka Laronia