Elämälle kiitos, sain siltä paljon! (Violeta Parra)

Entäs saikos sitä mies itkeä?
Ja, entäs kuka hallaa miestä, jolla on syän auki täälä?
Ja pittääkös naisten saaha huutaa, raivota ja kirota.
Ja pittääkös niittenki saaha itkeä ilman, että puhuthaan hormooneista. (Tv1/ohjelmat/itsenäisyyspuolue)

Äskön mie tulin tuohon olohuohneen puolele.
Mie siivosin ja aloin kattohmaan, että mikäs tuohon on jääny.
Oiken piti kumartua lattianrajhaan kattohmaan.
Siinä luki, että ”Tervetuloa Timantti!”

Ko molin muuttanu tänne, mie yritin putsata sitä läkkiä.
Mie putsasin ja putsasin sitä pois.
Putsasin, mutta se ei lähteny.
Sitte mie otin ja kirjotin tussila siihen pääle.
Molin kirjottanu, että tervetuloa timantti.
Ja siihen soli maastoutunu.
Ja unohtunu.
Ja nyt se löyty.

Molen timantti.
Molhaan kaikki timantteja, timantteja elämän.
Timantteja kaikki, kun oikein silmin katothaan.
(J.Karjalainen)

Tekopirteys ja kaatteettomat elämänilot on yhtä tyhjän kanssa. (K.Viikate/RT)
Mutta aito positiivisuus ja hyvä käytös on jotaki muuta?
Asioitten hoitaminen arvokkaasti.
Toisen ihmisen huomioon ottaminen.
Yhteistyö.
Vuorovaikutus.

Ja jos itkettää, antaa itkujen tulla.
Ja entäs se, että kukas se hallais, ko tullee se itku?

No, jossei sulla ole kethään puoluetoveria siinä, hallaa itte.
Hallaa itte itteä, silitä hellästi molempia poskiasti ja sano ihan syämen pohjasta: hyvä mie!

Tai jos halvaat kiljua, tehe sitte niin, KILJU SITTE!
Kilju ja huua, jos siltä tuntuu.

Pikku ulina ja ainainen valitus on uhrin vikinää (J.Sarasvuo) ja vie hermotki kaikilta.
Jatkuva purnaus toisten toimintatavoista ja jakkuvalinoista syö energiaa. (K.Viikate/RT)

Kilju siis vaivasti ympärhiinsä kaikila baanoila ja foorumeila!
Piä kiini mielipitteestästi.
Linnottauvvu oiken sen kanssa.
Ja huuva luijjaa.
Piä kiini mielipitteestästi ja kule ympärhiinsä.
Mene tiukasti sen kanssa joka paikhaan.
Mene ja kule muitten ihmisten yli, vaikka mitä tapahtus.
Vahingoniloa ja pilkkaa riittää niile, jokka aattellee vähänki toisela laila.
Tai ei ole meitä.
Ei kuulu meihin.

Mitäs tehtäs niile, jokkon eri mieltä, jokka ei ala meitä.
Eikä leiki meän kanssa?
Jokka on eri mieltä?

Ainaski poistaa toisinajattelevien kommentit?
Ja vielä hullumpaa, poistattaa vielä toisilaki!
Molen kuullu, että lähinaapurissa tapettiin semmoset, jokka oli vääränlaisia jotenki.

Niin ja seki asia, että jossie taistelet hullun kans, varo, ettei se tehe sitä sammaa sinun kans!?

Joskus vaihtoehot on vähissä.
Nyt se ainoa vaihtoehto, että net pittää hyväksyä, jokkon eri mieltä.

Hyväksymä nekki, jokka ei hyväksy, että met hyväksymä.
Ei auta mithään eikä kannata alkaa taistelheen, ei veikkosten henki.
Itkemä kuulkaa aina välilä vain näitä meän maljoja vähemmäksi!
Sillai tullee tillaa ottaa jotaki vasthaanki.
Saattas alkaa semmonenko vuorovaikutus.
Itke ja naura ja laula, ja anna toistenki tehä sitä sammaa.

Molen Hilkka Laronia ja sanon, TARTU MIKKIIN (Sami Hintsanen), ANNA PALAA, oleppa onnistuja tai uussuomalainen tai mikä tahansa persu tai piipertäjät sanokki olevasti, anna rakas ihminen palaa ja sano ittelesti kaikkea hyvvää ja omista ajatuksistasti mitä halvaat ja  anna toisilekki oikeus siihen sammaan!

Taistelusta tai tuohustelusta ei ole iloa kelheen.
Taistelu tappaa ja tuohustelu ei vielä lämmitä kethään eikä mithään.
Alamä täysilä vain sitä jotaki ommaa hommaa!
Alama täysin syvämin ja riemurinnoin ja ihan arvokkaasti ja kunnola!
Perehymä ja hoijjama asioita ja seisoma omien tekemisten takana ihan itte.
Ja annama toisile samat oikeuvvet.
Semmosta mie näen kyllä enimmäkseen ja päivä päivältä enemmän, tarallalllaallaaa!

Maailma on valmis. Tämä hetki on täysi ja kaunis, ihana, hyä ja oikeuvvenmukanen, jos halvaat.

Tai son mitä on ja just sitä mitä, met halvaama.
Valmis se ainaski on, niinko tälle hetkele.
Itkemä ja naurama sen kans.
Mitähän mie nyt alan seuraavaksi, kiitos ihmiset ko sain taas sanoa.

Rakastavin terffeisin Hilkka Laronia

http://www.laronia.com/

Hei, niin ja jos halvaat, ala mulle naamakaveriksi, mie hyväksyn kaikki, en kaikkien tekoja, mutta molen päättäny alkaa kaikkia:

http://fi-fi.facebook.com/people/Hilkka-Anneli-Lar…

Ilmoita asiaton viesti

Kiitos!

Ilmoitus asiattomasta sisällöstä on vastaanotettu