Pääsiäissatu!

Mie olen oiken oottanu, ettäkö pääsiäinen tullee, mie pääsen kertohmaan sulle pääsiäissaun. Tai siis selittämhään tämmösestä uskonnottomille sopivasta pääsiäissausta
tai saatta tet olla uskovaisiaki ihan vappaasti.

No, siis pääsiäisen alla jänikset ja kanat saa poikasensa,
niinko tiättäki ja niinko kläpit aina, net puput ja tiput on utelihaita
ja tutustuu toishiinsa ja leikkii yhessä
ja niitten perheekki tutustuu toissiinsa ja käy kylässä toisissa.

Sitte kerran non kylässä toisissansa,
niin semmonen vanha jänismies kyssyy,
ko net on alkanu puhuhmaan semmosia syvällisiä, niin se kyselee,
että mistäs se maailma on oiken tullu.
Tämähän on ajankohtanen asia,
ko meiläki on tämä hiukkaskone nyt onnistunu tässä ajassa
ja alkuräjähykset hanskassa, vai mitä!

No se vanha pupu tykkää, että sen suku tuli mettästä,
mutta mistä on maailma tullu?
Vanha kana sannoo, että miepä tiän,
sen voima vain met kanat tietää.
Maailma on tullu munasta.

Sitten se kana selittää omista munista
ja vanha jänisisäntä sannoo,
että joo joo, mutta jonku on pitäny hautoa se maailmanmuna.
No, kana siihen sitte selittää,
että ilman hautomista munasta ei tule mittään
ja on ollu semmonen iso maailman lintu
ja se maailman lintu muni sen munan
ja se on sen sitte hautonukki.

Jänikset kuunteli innoissansa ja kattelit kananmunia.
Ja sillon oli pääsiäinen
ja aurinko paistaa aina pääsiäisenä aivan erityisella tavalla.

No nyt jänisäiti alkaa jo kysellä, että mitä sille maailmanmunalle tapahtu
ja just sillon alkaa kuulua soittoa
ja jäniksethän on mahottoman musikaalisia
ja net nousee ylös ja alkaa liikkua sen soiton tahthiin.
Ja leivonenki kieppuu ilmassa ylös ja alas ja laulaa sammaa laulua.

Ja niinpä just sillo auringon sätteet ossuu niihin munniin
ja net alkaa värjääntyä.
Pääsiäisaurinko värjää net kaikilla erilaisila väreilä
ja mettän olennokki istuu alas aivan mykkinä
ja sitten alkaa vanha jänis puhua:
ensin oli maailman lintu
ja sitten maailman muna ja sitte
loisti valo maailman munhaan ja se hohti kaikkia värejä.

No, ei kaikki ole vielä siinä,
jatkaa vanha kana, anna minun selittää.
Ko minun munat on hauvvottu,
niin niistä kuuluu koputusta ja piipitystä,
muttako maailman muna oli valmis,
niin maailman munan kuori räjähti
ja maailma ja ihminen ja met kaikki kävelimä ulos sieltä maailman munasta.

Niinhän sen on täytyny olla, sannoo vanha jänis miettiväisenä
ja huomasi, että musikki oli lakanu soimasta.
Ja jänikset alko ihmetellä,
että mitä net tekis niille kauhniin värisille munille
ja net päätti antaa net maailman lapsille.

Ja vielä tänäki päivävänähän maailman kläpit ja vunukat saa ihmetellä tipuja ja pupuja ja kauhniita kirjavia pääsiäismunia ja aikuset ihastella kläppejä ja pukea pyhävaatheet päälle ja mennä kattohmaan purojen varsilta syvien asioitten merkkejä.

Tai pukea pyhävaatheet päälle tai olla pukematta ja olla yhtä tietäväinen ja viisas ko se vanha kanaki, että tietää mistä se maailma on tullu ja lukea vain netistä Ylen tiedeuutisia http://yle.fi/uutiset/tiede_ja_tekniikka/2010/03/h…

Hauskaa ja hellämielista pääsiäistä ja rakastavin pääsiäis-ilo-terhveisin Hilkka Laronia http://www.laronia.com/