Oodi Jokinaiselle – molema kiini väylässä ko onnellinen ihminen hyässä unessa!

Sie Joen nainen, minkä sie tehit?
Vallotit meän joen?
Vallotiksie meän joen?
Valloitit ja virta kuletti – ja kosket sie voitit.
Voi ihme.
Ja herratun aika!!

”Jokinainen virta sinua vei,
virta vei yötä päivää!
Jokinainen virta vei sinua yötäpäivää,
Jokinainen sinun matkasi nyt päättyy,
nouse joesta nyt…”

Jotenki näin laulo nuori kaunis nainen Tornionjoen rannassa.
Pikisaaren rannassa ja
Jokinaista purettiin.
Oli purkujuhlat!

Joennainen käärihelmat kashaan
Tuli pois joesta.
Ja sielä näky hame ennää läjässä.
Varaston takana.
Menossa uusio käythöön.
Vishiin.

Jokinainenhan meille jäi.
Sen henki.
Teän työn henki.
Muisto meille jäi.
Eipä taijja Joennaisen muisto häipyä aivan heti.
Se jäi väyhlään.
Jokinaisen henki.

Joo väyhlään se jäi.
Väylä muistaa.
Se ei unoha ja Joennainen on nyt ikunen osa sitä.

Kiitos Jokinainen!
Olit upea ja vallottava.
Kuinka soma sie olit sielä vetten päällä.

Ja vollottavakihan sie olit.
Net itkit sinun kans ja sinun kunniaksi.
Ja kyllä meitäki itketti.

Olitta tet semmonen vallotus ja vollotus, että kaikkea tet keksittäki.
Kyllä kylänmiehet ja tyttäret ja pojat ja ämmät ja ämmit päivittelit, vaikkei net kaikki tulheet siittä runnoihleen eikä framile porisheen, kyllä net tiesit ja ihmettelit itteksheen ja keskehnään teitä ja teän naishommia.

Siis ihana juttu ja Jokinaisen fyysinen ilmentymä keräs helmansa ja siirtyy muistoksi meän ihmisten ja meän väylän muisthiin ja miehleen!
Väylä muistaa.
Se on väylässä.

Kiitos Jokinainen ja tet sankari-ihmiset, jokka tuon rankan homman niin yksinkertasesti, arvokkaasti ja upeasti tehittä.

Täällä kulutus-kerska-teeskentely -maailmassa, mie niin arvostan tuommosta, että sanat ei riitä kertohmaan. Ja samahan se taas on minun arvostamisille, se teko oli parasta. Ilmiö sinänsä.

Mutta molemaki kiini väylässä ko onnellinen ihminen hyässä unessa! Son siinä eikä sole pojat eikä tyttäret vielä maailma menetetty ko tämmösiäki ilmiöitä sitä vaan tehhään. Näessie.

Kunnioituksella, kiitoksella ja rakhauella Hilkka Anneli Laronia http://www.laronia.com/

http://jnainen.kotisivukone.com/4

http://www.pohjolansanomat.fi/cs/Satellite/PS-Uuti…