Panemako hatun kierthän, että euskunnan laitaoikeiston eut saatas kohilhen?

Jo lapsena sitä alakoulusa tehthin seleväksi, ettei ruokalautashen ole koskemista ellei lausu ommaa mielipiethän. Aina kukin vuoropäivänä sano kuuluvhan äähnen, että ”Olen muuten sitä mieltä, että …”. Sen piti olla aivan muuta ko Karthakon hävityksen ehotusta, sen mielipithen.

Oppi meni perile ja hyä niin. Palathan tähän aivan lopusa.

Molen pannu merkile, että sielä euskunnan oikiala laiala pakkaapi olhen aina hätä siitä, että ko köyhät viepi rahat ja aina on rahat loppu ko köyhistä on puhe. Sosialiettuuksia, ja niin eelhen, net meinaa.

Ja ootappa, jos saahan tiethon, että son maahanmuuttaja, islaminuskonen tai muuten vain jollaki tavala halaveksuttavaksi katottava kansalainen joka apua saapi, niin soon iso roisto ja vie aivan kaiken ja vieläki enämpi, jos vain maholista.

Olipa niin tai näin, son kauhian saita viranomanen, joka päättääpi pikkutarkkojen riteerien mukhan annethanko sitä rahhaa vaiko ei. Ja ei veikkosten henki sitä anneta ollenkhan, jos ruvethan näyttelelhen rahan tarpheesa olevaa. Son nykyhän nopiasti katottu onko sitä tarvetta vai ei.

Mitä tämä tahtoopi sanua? Sitä, että puutheesa oleva saapi mutta ei yhthän enämpää ko on määrätty.  Pää tullee vetävän käthen pian aikaa ja sossutäti sannoo, että son sluut vinito, niinko vinetto.

Molen hunteeranu, että loppusko tuo euskunnan oikian laian ratikaalien valitus, jos met pantas hattu kierthän ja niitten eut kohilhen. Se eelyttäis tietenki tarpheitten kartotusta.

Tämä ois niinkö semmonen ratikaalivero. Kaikkia soppii pruuvata.

Olen muuten sitä mieltä, että panema selevitykshen panemako hatun kierthän vaiko emmä pane.

No nyt saiki luvan ruveta syöhmän jouluruokia.

Hyät Joulut, olipa laiala tai ei tai äärikeskelä, ei yhthän mithän väliä!

 

vmlouek

Yksityishenkilö. Poliittinen kanta: yksityisasia. Puhelinnumero: salainen.

Ilmoita asiaton viesti

Kiitos!

Ilmoitus asiattomasta sisällöstä on vastaanotettu